У заходняй частцы Беларусі, у цэнтры дзяржаўнага нацыянальнага парка “Белавежская пушча”, дзе волаты-зубры выходзяць амаль да сядзіб жыхароў, а другое звяр’ё сустракаецца амаль на кожнай сцежцы, размешчана наша ўстанова адукацыі “Навадворскі дзіцячы сад”.
Сама ўстанова не вялікая, налічвае дваццаць сем выхаванцаў (дзве рознаўзроставыя групы), чатырох педагогаў і загадчыка дзіцячым садам.
Так як установа з усіх бакоў акружана ляснымі масівамі, то і накірунак у рабоце яна абрала экалагічны.
Дзіцячы сад у гэтым накірунку працуе ўжо звыш дзесяці гадоў. Спачатку была створана экалагічная сцежка па-за тэрыторыяй дзіцячага сада, на прыпынках якой выхаванцы знаёміліся ўвачавідку з разнавіднасцямі жывых арганізмаў, лесу, лугу, вадаёма, збіралі і рабілі гербарыі, назапашвалі матэрыял для стварэння экалагічнага пакоя, а з цягам часу далейшага выкарыстання пры правядзенні вопытаў і даследаванняў.
У 2009 годзе створаны экалагічны пакой, пазней там размясціўся і зімовы сад. Разам з тым пачынаючы з 2009 года педагагічны калектыў прыйшоў да высновы, што для інтэлектуальнага развіцця асобы выхаванца, для выхавання дапытлівасці і цікаўнасці да акружаючага асяроддзя малой радзімы неабходна падабраць новую методыку. Паспрабаваўшы, метад праектаў апраўдаў сябе. І вось ужо на працягу сямі гадоў педагогі разам з выхаванцамі і іх бацькамі працуюць у тандэме.
З гэтага часу распрацавана і рэалізавана шэсць кароткатэрміновых і адзін доўгатэрміновы праект. Усе яны маюць сваю назву: “Птушыная сталоўка”, “Экалагічная лыжня”, “Лекавыя травы”, “Сонечны праменьчык”, “Наш агарод”, “Птушка года” і “Экалагічная сцежка дашкольнай установы адукацыі”. Праект “Птушка года” быў распрацаваны ў 2013 годзе. Ён змяшчае ў сабе ўсіх “птушак года” пачынаючы з 2000-га. Мясцовае Навадворскае лясніцтва падаравала дрэва, зламанае бурай, што стала прадпасылкай для праекту. Бацькі дапамаглі выразаць і разам з выхаванцамі размалявалі птушак. Педагогі сфармулявалі праблему і ўсе разам шукалі шляхі яе вырашэння. З кожным годам праект папаўняецца птушкай , назіраннямі і звесткамі аб ёй. Бацькі і выхаванцы змяняюцца, але цікаўнасць застаецца.
Разам з новым праектам прыйшоў і новы статут установы. У 2013 годзе ўстанова стала апорнай установай адукацыі, працуючай у экалагічным накірунку.
Не выпадкова быў абраны менавіта гэты накірунак. Акрамя таго, што дзеці цясней сустракаюцца з багаццямі малой радзімы, яе навакольным асяроддзем, прыроднымі багаццямі, ажыццяўляецца пераемнасць паміж вывучэннем прыроды ў дзіцячым садзе і больш глыбокае яе пазнанне ўжо ў час вучобы ў дзяржаўнай установе адукацыі “Навадворская сярэдняя школа Свіслацкага раёна”. Цеснае супрацоўніцтва са школай, бацькамі, соцыумам дае дадатковыя вынікі сумеснай працы.

Загадчык ДУА “Навадворскі дзіцячы сад”
Якута Ірына Станіславаўна